Скопје како една општина

Осим романчиња понекад знам да прочитам и по некое интервју. 
Па така го прочитав едно од последните интервјуа на скопскиот градоначалник Шилегов.
И право да ви кажам се изненадив, пошто не сум знаел дека сум истомисленик со дотичниот. 
Него за шо се работи?

У ова интервју станува збор за децентрализацијата, односно за скопските општини. И он исто како мене мисли дека Скопје подобро би функционирал како една општина, па ќе рече, цитирам: - Скопје има двостепена локална самоуправа, односно на територијата има десет општини со свои надлежности и Град Скопје со надлежност над целата територија, со законски поделени ингеренции во комуналната сфера, урбанизмот, сообраќајот итн. Секоја општина има своја администрација од стотици вработени и свој буџет од неколку десетини милиони евра. Град Скопје има буџет од околу 80 милиони евра, а заедно со десетте општини можат да соберат вкупен буџет од околу 150 милиони евра, па се наметнува прашањето дали е подобро Скопје да биде една единица на локалната самоуправа со единствен буџет и локална администрација.
- Градоначалниче, не да е подобро него не знам, у секој случај полошо од ова не може да биде, да не се лажеме.

Па ќе додаде: – Мое лично мислење е дека една општина, односно единица на локална самоуправа на ниво на Скопје ќе има далеку подобри резултати. Но, велам, ова е мое мислење, затоа што ова прашање не е дискутирано во ЗЕЛС, како ни со колегите од скопските општини.

Ја само ќе додадам, - епа градоначалниче ако мислите дека Скопје како една општина ќе има далеку подобри резултати тогаш што се чека? Дискутирајте во ЗЕЛС и со колегите од скопските општини, пошто вака више не го бива. Скопје не виде никаков аир со толку општини. Да не набрајам сега, загаден ваздух, бетон, масакр на иљадници дрва, пренаселеност, задужување. Најголема штета Скопје претрпе баш од тие општини. Разговарајте, а ја можам да се опкладам дека за вакво нешто нема Скопјанец што не би се сложил. Да не остане на зборови само. 

А се надевам штовани читатели дека и вие сте истомисленици со Шилегов, ако ништо друго барем за ова прашање. Очигледно е дека Скопје со толку општини не функционира и тоа мора да се промени. И Руди Џулијани да го ставиме за градоначалник на Скопје џабе ќе биде. Вака како што е со еден куп општини никој не го оправа. 
И конечно боље да имаме 1 сиромашна општина него 10 сиромашни општини, односно 18.

Овде може да ги прочитате текстовите од 17. 02. 2019 година За Скопцките градоначалници (и советници), и од 08.06.2019 година Китење со туѓи перја,  у кои се збори баш за она што сега Шилегов срамежливо го најавува, тоест за непотребноста на толку општини у Скопје.

А целото интервју на Шилегов може да го прочитате овде.